Kuwa 13 Ugushyingo, Minisitiri y’Ubuzima muri Uganda, Jane Ruth Aceng yatangaje ko icyorezo cya Ebola gikomeje gufata indi ntera, aho cyagaragaye mu Burasirazuba bw’iki gihugu muri Jinja ivuye mu bice byo hagati mu gihugu.
Kuva tariki 20 Nzeri muri uyu mwaka, nibwo iki cyorezo cyatangira mugarahara muri Uganda, aho n’umubare ugenda uba munini w’abantu bandura Ebola n’abo ihitana.
Imibare ya Minisiteri y’Ubuzima muri Uganda igaragaza ko hamaze kurwara abasaga 135, mu gihe 53 bo bahitanywe nayo nubwo iyi mibare hari impungenge ko atari iy’ukuri itangazwa.
Ijanisha kuri Ebola rigaragaza ko ari indwara yica nibura 50% by’abayanduye bityo ko ari ingenzi kuyirinda.
Abinyujije kuri Twitter, Minisitiri w’Ubuzima, Jane Ruth Aceng yavuze ko muri Jinja habonetse umugabo w’imyaka 45 wapfuye ku wa kane tariki 10 Ugushyingo 2022 hakozwe isuzuma ry’umubiri bigaragara ko yari arwaye Ebola.
Ubusanzwe Ebola yandurira mu matembabuzi ava mu mubiri, ku buryo ishobora gukwirakwira mu gihe umuntu akoze ku wanduye cyangwa mu guhererekanya ibintu byagiyeho ubwandu.
Urwaye Ebola agira umuriro, ababara umutwe, aribwa mu ngingo, mu muhogo, agacika intege, agahitwa, akaruka cyane kandi kenshi. Mu bindi bimenyetso agaragaza harimo kuribwa mu nda no kuva amaraso ahantu hose hari umwenge ku mubiri.
Bivugwa ko virusi ya Ebola ikomeje guca ibintu muri Uganda ifitanye isano na virusi yo muri Sudani aho kugeza ubu nta rukingo irabonerwa bitandukanye n’ubwoko bwa virusi ya Ebola yavugwaga muri Repubulika iharanira Demokarasi ya Congo.
Eric TUYISHIME
